2025 жылғы 24 сәуірде «Әлеуметтік-гуманитарлық пәндер және әлем тілдері» кафедрасы жанындағы «Өлкетану» клубы Қазақстан халқының бірлігі күніне арналған тағылымды іс-шара өткізді. Бұл мереке — елімізде тұрып жатқан барлық этностар арасындағы достықтың, өзара түсіністік пен келісімнің нышаны. Қазақстан — көпұлтты мемлекет. Оның аумағында түрлі халықтардың өкілдері мен 18-ден астам конфессия өмір сүреді. Қазақстан халқының бірлігі күні — қазақстандық патриотизмді, бірлікті және ортақ Отанға деген адалдықты дәріптейтін маңызды мейрам.

Іс-шара барысында қатысушылар ұлтаралық келісімнің маңыздылығына тоқталып, әртүрлі мәдениеттерді танытатын отбасылық тарихтарымен бөлісті, сондай-ақ еліміздің дамуына барлық этностардың қосқан үлесі жайында пікір алмасты. Мәдени қойылымдар, көрмелер мен студенттер арасындағы ұлтаралық диалогты нығайтуға бағытталған интерактивті сессиялар ұйымдастырылды.

Шарада Қазақстан Республикасының Президенті Қасым-Жомарт Тоқаевтың 2025 жылғы 24 сәуірде өткен Қазақстан халқы Ассамблеясының ХХХІV сессиясында сөйлеген сөзіне ерекше мән берілді. Мемлекет басшысы еліміздің оқу-тәрбие үдерісінде «Біз әртүрліміз, бірақ теңбіз» және «Біртұтас Қазақстан халқы» қағидаттары берік орнығуы керектігін атап өтті. Бұл құндылықтар — қуатты және біртұтас мемлекет құру жолындағы айнымас бағдарымыз. Іс-шара жастар арасында бірлік, өзара құрмет және төзімділік идеяларын жүзеге асырудың жарқын көрінісіне айналды.