METU университетінде студенттермен ашық диалог форматындағы кездесулердің екінші күні өтті. Бұл жолы кездесу «Инженериядағы Smart технологиялар» және «Бағдарламалық инженерия» кафедраларының студенттерімен ұйымдастырылды. Іс-шара студенттермен кері байланысты нығайтуға және оқу үдерісінің ашықтығын арттыруға бағытталған жүйелі жұмыстың жалғасы болды.
Кездесу Жастар саясаты департаменті мен Регистратор офисінің бірлесуімен өтті. Ашық диалог барысында студенттерге Platonus ақпараттық жүйесінің жұмыс істеу қағидаттары түсіндіріліп, оқу үдерісіне қатысты маңызды мәселелер талқыланды.
Атап айтқанда, сабаққа қатысу, академиялық және ішкі тәртіпті сақтау, сондай-ақ старосталардың оқу процесін ұйымдастырудағы рөлі мен жауапкершілігіне ерекше назар аударылды.
Кездесу еркін пікір алмасу форматында өтіп, студенттер өздерін толғандырған сұрақтарды қойып, нақты әрі жан-жақты жауаптар алды. Сонымен қатар қатысушыларға университет көлемінде жүзеге асырылып жатқан «Заң мен тәртіп», «Адал азамат» және «Таза Қазақстан» бастамалары таныстырылды. Бұл жобалар студенттер арасында құқықтық мәдениетті, академиялық адалдықты және әлеуметтік жауапкершілікті қалыптастыруға бағытталған.
Осындай кездесулер студенттердің сұраныстарына жедел жауап беруге, олардың ұсыныстарын ескеруге және университет әкімшілігі мен студенттер арасындағы өзара сенімді нығайтуға мүмкіндік береді. Ашық диалог форматы қолайлы білім беру ортасын қалыптастыруға және студенттердің университет өміріне белсенді араласуына ықпал етеді.
METU-де ашық диалог форматындағы кездесулер алдағы уақытта да жалғасып, университеттің өзге де кафедраларының студенттерімен өткізу жоспарлануда.