Халықаралық инженерлік-технологиялық университетте (METU) жаңа үстел теннисі клубы өз жұмысын бастады. Бұл бастама университеттегі спорттық өмірді жандандыруға, студенттердің дене белсенділігін арттыруға және салауатты өмір салтын кеңінен насихаттауға бағытталған.

Клубтың ашылуы университеттің спорттық инфрақұрылымын дамыту жолындағы маңызды қадамдардың бірі болды. Үстел теннисі – жылдамдықты, ептілікті, зейінді және стратегиялық ойлауды талап ететін спорт түрі. Сонымен қатар, бұл спорт студенттердің күйзелісті азайтып, оқу үдерісінен кейін белсенді демалуына мүмкіндік береді.

Клуб ашылған күннен бастап команданың тұрақты жаттығулары басталды. Жаттығулар жүйелі түрде өткізіліп, қатысушылар техникалық шеберліктерін жетілдіріп, ойын тактикасын меңгеруде. Команда құрамында әртүрлі курс пен білім беру бағдарламаларында оқитын студенттер бар, бұл өзара тәжірибе алмасуға және командалық рухты нығайтуға ықпал етеді.

Үстел теннисі клубы бастапқы деңгейдегі студенттерге де, тәжірибесі бар ойыншыларға да ашық. Клубтың басты мақсаты – университет атынан шығатын мықты команда қалыптастырумен қатар, спортқа қызығушылығы бар студенттерді бір ортаға біріктіру, олардың физикалық дайындығын және командалық өзара әрекетін дамыту.

Университет басшылығы студенттік спортты дамытуға ерекше көңіл бөліп, мұндай бастамалардың жастар арасында белсенді өмір салтын қалыптастыруда, университеттік бірлікті күшейтуде және жан-жақты дамыған тұлға тәрбиелеуде маңызды рөл атқаратынын атап өтті.

METU-дегі үстел теннисі клубы барлық қызығушылық танытқан студенттерді жаттығуларға қатысуға, команда құрамына қосылуға және университеттің спорттық жетістіктеріне бірге үлес қосуға шақырады.