Халықаралық инженерлік-технологиялық университетте (METU) республикалық «Таза Қазақстан» экологиялық акциясы аясында «ESG: ғылым, білім, бизнес және қоғам — тұрақты дамудың синергиясы» тақырыбында практикалық сессия ұйымдастырылды. Іс-шара ғылым, бизнес, қоғамдық ұйымдар және студенттер өкілдерін біріктіріп, тұрақты даму қағидаттарын іс жүзінде енгізу мәселелерін талқылауға мүмкіндік берді.

Сессияны университет ректоры Дархан Берікович Ақпанбетов ашып, ESG тәсілдері бүгінгі таңда тек теориялық ұғым емес, білім беру бағдарламаларының, ғылыми зерттеулердің және болашақ мамандардың практикалық қызметінің ажырамас бөлігіне айналып отырғанын атап өтті. Ол университеттің басты міндеті — білім берумен қатар қоршаған орта мен қоғам алдындағы жауапкершілікті сезінетін жаңа буынды қалыптастыру екенін жеткізді.

Іс-шараның маңызды сәттерінің бірі — METU мен «Жасыл Алматы» коммуналдық мемлекеттік мекемесі арасында ынтымақтастық туралы меморандумға қол қойылуы болды. Бұл құжат экологиялық бастамаларды бірлесіп жүзеге асыруға және студенттерді қалалық ортаны жақсартуға бағытталған практикалық жобаларға тартуға мүмкіндік береді.

Сессия барысында экологиялық ұйымдар, бизнес және ғылыми қауымдастық өкілдері баяндама жасады. «Жасыл Алматы» бастамасының жетекшісі Тимур Елеусизов қаланың экологиялық мәдениетін дамыту және көгалдандыру жобалары туралы айтты. ECO Network ұйымының негізін қалаушы Евгений Мухамеджанов компанияларда ESG қағидаттарын енгізудің практикалық жолдарын, соның ішінде «жасыл офис» бағдарламалары мен экологиялық аудит мәселелерін таныстырды. Сонымен қатар ғылым, білім және цифрлық технологиялардың тұрақты даму мақсаттарына жетудегі рөлі талқыланды.

Сессияда ESG-нің білім беру саласындағы маңызына да ерекше назар аударылды. Профессорлық-оқытушылық құрам өкілдері тұрақты даму қағидаттарын оқу бағдарламаларына енгізу, жаңа буын мамандарын даярлау және «жасыл» кәсіпкерлікті дамыту бағыттары туралы баяндады. Қалалық ортаны және экологиялық ресурстарды басқаруда датчиктер, геоақпараттық жүйелер және аналитикалық платформалар сияқты цифрлық құралдарды қолдану мүмкіндіктері көрсетілді.

Практикалық сессия ашық диалог форматында өтіп, қатысушылар тәжірибе алмасып, нақты жобалар мен болашақ ынтымақтастық бағыттарын талқылады. Ұйымдастырушылар мұндай іс-шаралар жастардың экологиялық жауапкершілігін арттырып, тұрақты даму бастамаларын дамытуға ықпал ететінін атап өтті.

Аталған кездесу ESG қағидаттарын жүзеге асырудағы маңызды қадам болып, ғылым, білім, бизнес және қоғамның бірлескен әрекеті нақты нәтижелерге жеткізе алатынын көрсетті. Қатысушылар сессия қорытындылары жаңа жобалар мен серіктестіктердің бастамасына айналады деген сенім білдірді.