Халықаралық инженерлік-технологиялық университетінің (МИТУ) Ғылым және инновациялық қызмет департаментінің директоры, PhD Мөлдір Қуатова Қытай Халық Республикасының Ганьсу провинциясы Үкіметі ұйымдастырған шетелдік ғалымдар мен мамандарға арналған халықаралық бағдарламада Қазақстан Республикасының атынан қатысты.

Конкурстық іріктеу қорытындысы бойынша 70-тен астам үміткердің ішінен әлемнің 18 елінен 19 делегат бағдарламаға қатысуға шақырылды. Солардың қатарында МИТУ өкілі Мөлдір Қуатова да болды.

Бағдарлама ғылым, жоғары білім және инновациялар саласындағы мемлекеттік саясатты, жоғары технологиялық экономика үшін кадрлар даярлаудың заманауи модельдерін, сондай-ақ халықаралық ғылыми және академиялық ынтымақтастықты дамыту мәселелерін зерделеуге арналды.

Бағдарлама аясында қатысушылар Ганьсу провинциясының жетекші университеттерінде, кәсіптік білім беру орталықтарында, инновациялық парктерде, жоғары технологиялық кәсіпорындарда, ғылыми ұйымдарда және мемлекеттік мекемелерде болды. Білім, ғылым және өндірістің интеграциясы, инновациялық инфрақұрылымды дамыту, технологиялар трансфері және университеттердің өнеркәсіппен өзара іс-қимылы мәселелеріне ерекше назар аударылды.

Бағдарламаға қатысу ғылыми-технологиялық даму саласындағы озық халықаралық тәжірибені зерделеуге, жаңа кәсіби байланыстар орнатуға және Қытайдың жоғары оқу орындарымен, ғылыми ұйымдарымен және индустриялық серіктестерімен ынтымақтастықтың перспективалы бағыттарын айқындауға мүмкіндік берді.

Алынған тәжірибе МИТУ-дың халықаралық ғылыми қызметін одан әрі дамытуға, шетелдік университеттермен және ғылыми-зерттеу орталықтарымен серіктестікті кеңейтуге, сондай-ақ бірлескен білім беру, ғылыми және инновациялық жобаларды іске асыруға пайдаланылатын болады.