Қазақстан Республикасының Президенті Қасым-Жомарт Тоқаев 2024 жылғы 2 қыркүйектегі Қазақстан халқына Жолдауында жоғары білім беруді интернационалдандырудың және шетелдік студенттер үшін қолайлы жағдай жасаудың маңыздылығына ерекше тоқталды:

«Қазіргі уақытта еліміздің жоғары оқу орындарында 31 мыңнан астам шетелдік студент білім алуда. Бұл – Қазақстан үшін рекордтық көрсеткіш. 2029 жылға қарай олардың санын 100 мыңға дейін арттыруымыз керек. Ол үшін визалық режимді жеңілдетіп, шетелдік студенттердің елімізде білім алуына барынша қолайлы жағдай жасау қажет. Сонымен қатар үздік түлектердің Қазақстанда қалып, жұмыс істеуіне мүмкіндік беретін жұмыспен қамту бағдарламасын іске қосу керек».

Мемлекет басшысы айқындаған басымдықтарға сәйкес Халықаралық инженерлік-технологиялық университеті (METU) жоғары білім беруді интернационалдандыруға, шетелдік студенттерді тартуға, олардың академиялық және әлеуметтік бейімделуіне, сондай-ақ қолайлы әрі ашық көпмәдениетті университеттік орта қалыптастыруға ерекше назар аударады.

Осы бағыттағы жұмыстың аясында METU Халықаралық ынтымақтастық департаменті 2026–2027 оқу жылындағы шетелдік студенттерге арналған алғашқы іс-шара – International Welcome Day «Welcome to METU» кездесуін өткізді.

Іс-шара университеттің шетелдік студенттерін бір алаңға жинап, жаңа оқу жылының басында танысуға, қажетті ақпарат алуға және ашық пікір алмасуға мүмкіндік берді.

Қазіргі таңда METU-де Америка Құрама Штаттары, Ұлыбритания, Әзербайжан, Марокко, Беларусь, Түркия, Қытай, Қырғыз Республикасы, Моңғолия, Ресей, Түрікменстан, Өзбекстан және Украинадан келген студенттер білім алуда. Осындай кең география университетте халықаралық және көпмәдениетті білім беру ортасын қалыптастыруға ықпал етеді.

Іс-шара барысында Халықаралық ынтымақтастық департаментінің директоры Қарлығаш Нұрланқызы құттықтау сөз сөйлеп, шетелдік студенттерді жаңа оқу жылының басталуымен құттықтады. Ол студенттерге оқуда табыс, жаңа жетістіктер және METU-дегі белсенді студенттік өмір тіледі.

Кездесу барысында Қарлығаш Нұрланқызы студенттерді университетпен таныстырып, METU-дің білім беру мүмкіндіктері, заманауи инфрақұрылымы мен зертханалары туралы ақпарат берді. Шетелдік студенттердің университет ортасына бейімделуі және көші-қон талаптарын сақтауы мәселелеріне ерекше назар аударылды.

Студенттерге көші-қон есебіне тұру, қажетті құжаттарды уақытылы рәсімдеу және жаңарту, белгіленген мерзімдерді сақтау, сондай-ақ шетелдік азаматтардың Қазақстан Республикасында болу ережелері бойынша негізгі ақпарат берілді.

Кездесу ашық диалог форматында өтті. Шетелдік студенттер оқу үдерісі, академиялық мәселелер, көші-қон рәсімдері, мәдени-ойын-сауық іс-шаралары және университеттегі студенттік өмірге қатысты сұрақтарын қойды.

Халықаралық ынтымақтастық департаментінің қызметкерлері студенттерге көші-қон мәселелері бойынша кеңес беріп, сондай-ақ METU-дің шетелдік серіктес университеттермен бірлесіп жүзеге асыратын академиялық ұтқырлық бағдарламаларына қатысу мүмкіндіктерімен таныстырды.

Кездесудің жеке бөлімі Халықаралық ынтымақтастық департаменті жанындағы WING халықаралық студенттік қауымдастығымен танысуға арналды. Көптеген шетелдік студенттер WING қатарына қосылып, университеттің халықаралық, мәдени, қоғамдық және студенттік іс-шараларына белсенді қатысуға ниет білдірді.

International Welcome Day «Welcome to METU» 2026–2027 оқу жылында Халықаралық ынтымақтастық департаменті өткізетін іс-шаралар сериясының бастамасы болды. Мұндай кездесулер шетелдік студенттердің жаңа академиялық және мәдени ортаға тезірек бейімделуіне, бір-бірімен танысуына, қажетті қолдау алуына және METU университеттік қауымдастығының белсенді мүшесі болуына мүмкіндік береді.

METU шетелдік студенттердің географиясын кеңейту, халықаралық ынтымақтастықты дамыту және әлемнің әртүрлі елдерінен келген студенттер үшін қолайлы білім беру ортасын қалыптастыру бағытындағы жүйелі жұмысын жалғастырып, Қазақстанның жоғары білім беру жүйесін интернационалдандыру міндеттерін іске асыруға өз үлесін қосуда.