2026 жылғы 8 қазанда METU университетінің ПИ-25-1.3 және ПИ-25-1.4 топтарының студенттері Қазақстан Республикасының Ұлттық орталық музейіне барды. Экскурсияны «Әлеуметтік-гуманитарлық пәндер және әлем тілдері» кафедрасының қауымдастырылған профессоры Шаймұханова Сәуле Дүйсетаевна оқу және тәрбие жұмысы аясында ұйымдастырды. Музей экспозицияларымен танысу оқу сабақтарын мазмұнды түрде толықтырды. Студенттер еліміздің тарихын археологиялық олжалар, дәстүрлі тұрмыс заттары, қолданбалы өнер туындылары, фотосуреттер мен құжаттар арқылы таныды. Бұл жәдігерлер әртүрлі ұрпақтардың өмірі мен мәдениетінен сыр шертеді. Музей экспозициялары Қазақстанның ежелгі дәуірден қазіргі заманға дейінгі тарихи даму жолын жүйелі түрде көрсетеді. Палеонтология және археология залы ежелгі кезеңдер мен археологиялық мұралар туралы мәлімет берсе, тарихи этнография залы қазақ халқының дәстүрлі мәдениетімен таныстырады. Ұлттық киімдер, кілемдер, тұрмыстық бұйымдар мен киіз үй халықтың шаруашылық ерекшеліктері, қолөнері және рухани құндылықтары күнделікті өмір салтын қалай қалыптастырғанын көрсетеді. «Қазақстан тарихы» залы еліміздің мәдени алуандығын ашып, Ұлы Отан соғысы жылдарында майданда және тылда ерлік көрсеткен қазақстандықтардың қаһармандығын есте сақтауға мүмкіндік береді. «Тәуелсіз Қазақстан» экспозициясы егемен мемлекеттің қалыптасуына, оның рәміздеріне, ұлттық валютасына және тәуелсіздік кезеңіндегі маңызды өзгерістерге арналған. Бұл материалдар жиынтығы еліміздің тарихи дамуының сабақтастығын терең түсінуге көмектеседі.

Музейге бару студенттердің дүниетанымын кеңейтуге, Қазақстан тарихына деген қызығушылығын арттыруға және ұлттық мұраға құрметпен қарауын қалыптастыруға ықпал етті. Музей жәдігерлерімен тікелей танысу өткен тарихты көрнекі әрі мазмұнды түрде зерделеуге мүмкіндік берді. Осындай экскурсиялар кафедра жұмысының маңызды бөлігі болып табылады. Олар білім беруді, мәдени-ағартушылық қызметті және азаматтық-патриоттық тәрбиені ұштастырып, студенттердің өз елінің тарихын терең түсінуіне және мәдени мұрасының құндылығын бағалауына ықпал етеді.